Welkom by Privaatskool Elnatan se webwerf!

Baie welkom by die webtuiste van Privaatskool Elnatan - een van die trotsste skole in Namibië.

Ons skool bestaan op Stampriet sedert 1992 en het in April 2012 sy 20ste bestaansjaar gevier.

Ons is ‘n Christelike Afrikaanse Privaatskool wat geregistreer is by die Ministerie van Onderwys van Namibië. Ons skool bestaan tans uit ± 370 leerlinge met 61 personeellede (onderwysers, administratiewe-, terrein- en koshuis-personeel ingesluit).

Ons is baie trots op ons groot en gevestigde koshuisfasiliteite waar meer as 80% van ons leerlinge in vier moderne koshuise inwoon. Leerlinge van oor die hele land maak Elnatan hul tuiste en ons lok kinders van sover as Katima Mulilo, Swakopmund, Gobabis en Rosh Pinah.

U word hartlik uitgenooi om u op hoogte te bring van die geskiedenis en vermoë van hierdie relatiewe jong skool wat die koers en toekoms van u kind sal bepaal.

En aangesien daar min skole is wat kan spog met die prestasies, waardes, tradisies en geleenthede wat Privaatskool Elnatan u bied, sal u keuse vir u kind heel logies op Elnatan val.

Geleë tussen die 52 palmbome wat reeds die volwasse ouderdom van meer as 115 jaar bereik het en voortdurend gevoed word deur die onuitputlike artesiese bronne van Stampriet, kan 'n kind nie in meer ideale omstandighede skoolgaan nie.

Mnr. Hugo Vermeulen, Skoolhoof

Die plaasomgewing en die plattelandse atmosfeer maak ons skool spesiaal en uniek. Die fasiliteite van Privaatskool Elnatan is egter die van die moderne hedendaagse wêreld en elke kind ervaar dus die wonderlike van beide wêrelde.’n Skool atmosfeer uit die boonste rakke!

Moet dus nie verder tyd mors nie... snuffel rond op ons webtuiste, want sien is glo.

God Voorsien

Ander Elnatan feite...

Ons glo dat sukses, prestasies en opvoeding net kan geskied in 'n gedissiplineerde omgewing.
Elnatan groei van 110 leerlinge in 1992 tot tans ongeveer 370.
Die skool se onderwysers-korps neem vanaf 9 in 1992 toe tot ongeveer 30.
Die skool handhaaf 'n byna 100% matrikulasie slaagsyfer deur al die jare van sy bestaan.
Ons matrikulante is veral baie gesog by Universiteite en ander Tersiêre instansies as gevolg van die matriek-eksamen (IEB) wat ons skryf.
Van ons matrieks het al meestergrade behaal terwyl ander hoë en senior poste in verskeie sektore beklee.
Voldoende koshuisgeriewe is geskep om al ons kosgangers te akkommodeer.
Die skool beskik tans oor 26 pragtige klaskamers wat spesialis-lokale insluit soos 'n rekenaarsentrum, hotelbestuurklas en kombuis.
Op Sportgebied, is baie van ons leerlinge oor die afgelope jare opgeneem in Namibiese spanne wat internasionaal meegeding het. Dit is veral op die gebiede van Rugby, Netbal, Hokkie, Krieket, Atletiek, Jukskei, Gymkhana en Perde-uithouritte
Ons spits ons daarop toe om ook ons leerlinge op kulturele gebied te ontwikkel en hulle alle moontlike geleenthede te bied om hulle potensiaal uit te leef.