Geagte Ouers

Uit 'n sopnat Stampriet, waarvoor ons baie dankbaar is, gaan ons probeer om die nodige inligting by u te kry:

1. Die Sone Byeenkoms vir Hoërskole, wat die naweek in Mariental sou plaasvind, is voorlopig verskuif na Vrydag, 27 Februarie 2009, sou die reën dit toelaat. Ons gaan probeer om die Sub-sone vir Laerskole, wat al verlede naweek moes plaasvind, deur die loop van volgende week te laat plaasvind. Alles hangende die reën, ons kan dus nie 'n spesifieke dag gee nie.

2. Vanaf 29 April tot 2 Mei vind daar weer in Windhoek twee Jukskei toetse plaas tussen Suid-Afrika en Namibië, waaraan 5 van ons leerlinge gaan deelneem. Baie geluk aan hierdie leerlinge en ons vertrou dat albei spanne hierdie keer aan die wenkant gaan wees.

3. Die Senior Leerlingraad wil graag bankies op die terrein sweis waarop leerlinge gedurende pouses en namiddae kan sit. Hulle versoek dus ouers om te help met die nodige yster en sal dit ook baie waardeer as daar pa's is wat kan help met die sweiswerk. Skakel asb met Juf Elize, 081-2438169, indien u met een van die twee kan help.

4. Ons het slegs 400 Dagboeke vir 2009 bestel waarvan net 200 tans verkoop is. Die prys is nou slegs N$55.00 en ons wil ouers baie mooi vra of u nie tog maar 'n dagboek vir uself en die kinders wil koop nie.

5. Me Jeanette van Wyk het ‘n hele aantal pragtige Koi-visse wat sy wil verkoop teen N$60.00. Vir elke vis wat sy verkoop skenk sy N$10.00 aan die skool. Skakel haar by 063-252442 indien u belangstel. Ons sê ook baie dankie vir die pragtige gebaar teenoor die skool.

6. Ons en ons kinders is so geseënd en het soveel om teenoor die Here voor dankbaar te wees. Die reën het soos strome van seën oor ons dorre aarde uitgestort. 'n Mens kan behoorlik sien hoe die lammers en kalwers groei. Almal van ons het iemand baie na aan ons of wat ons ken wat 'n kankerlyer is. Dit is ook 'n siekte waarvan nie een van ons noodwendig gevrywaar is nie. Die tyd van die jaar is sinoniem met fondinsamelings vir die Kankervereniging. Kom ons wys ons dankbaarheid teenoor die Here deur N$3 vir 'n appel te betaal om iemand anders (of dalk jou eie?) lewe te vergemaklik of sy kanker te help genees. Wat julle dalk nie weet nie is dat die geld aangewend word om mense by te staan wat nie behandeling kan bekostig nie, om Huis Akasia (die Kankerhuis) steeds gratis toeganklik te maak vir die kankerpasiënte en hul families asook vir navorsing.

U hou dalk nie eers van appels nie, maar dit gaan nie oor wat u ONTVANG nie, wel oor dit wat u aan 'n ander GEE. U kan ook die appels aan ons "Helpende Hande"–projek by die skool skenk, wat dit weer sal gee aan iemand wat dit nodig het. Kinders kan vanaf Maandag hul geld by die klasonderwysers inbetaal.

7. Tannie Julie vra dat alle balletleerlinge sal sorg dat hulle volledige balletuitrusting volgende week by die skool is. Daar is ook kinders wat ballet neem wat steeds nie betaal het nie, wat heeltemal teen die reëls is. Kom ons bring dit ook asb op datum. Sy vra ook dat balletleerlinge die foutiewe DVD's vir haar sal terugbring.

8. Me Elrien Garbers het Golden Retriever Labrador hondjies waarvoor sy goeie base soek. Skakel haar by 081-1282601 indien u belangstel.

9. Mej Elnatan vind plaas op 8 April om 19:00 in die skoolsaal. Kaartjies kan reeds by die sekretaresse gekry word teen N$70.00 per persoon, wat 'n ete insluit. Hierdie is 'n baie gewilde geleentheid en daar is beperkte plekke. Kry dus vroegtydig u kaartjie.

10. Juf Marisa het 'n 2004 Hyundai Getz met lugversorger, CD-speler, elektriese vensters en nog baie ander wat sy wil verkoop. Die karretjie het slegs 75 000km op en is in 'n baie goeie toestand. Hulle moet 'n bakkie koop en enigiemand wat belangstel kan haar skakel by 081-2042960. Prys N$65 000.00

11. Aangeheg 'n advertensie van Salon Avante, Stampriet. Skakel Francia by 081-2132251 vir afsprake.

12. Daar is hierdie week 18 leerlinge, seuns en dogters, uitgehaal wie se hare gekleur was. Hierdie is 'n tendens waarvan ek glad nie hou nie en wat ons geensins gaan toelaat nie. Ek versoek dus ouers baie ernstig om toe te sien dat hierdie kinders se hare regkom en dat dit nie weer gedoen word nie. Dit is dinge vir grootmense en as ons kinders hulle nou al besig hou met die dinge van grootmense, wat bly dan eendag vir hulle oor?

13. 'n Span van 24 atlete het verlede naweek in Walvisbaai aan 'n Prestige Atletiekbyeenkoms deelgeneem en het altesaam 21 medaljes verower waarvan 10 goud, 6 silwer en 5 brons. Hulle het ook 7 rekords verbeter en Joleen le Roux is aangewys as die Victrix Ludorum van die byeenkoms. Die span het algeheel tweede geëindig, net na Walvisbaai Hoërskool en bo skole soos WHS en Windhoek Gimnasium. Hierdie was 'n besondere prestasie en ons sê baie geluk aan hierdie atletiekspan met 'n skitterende vertoning.

14. Gisteraand was ons jaarlikse Afrikaanse Redenaarskompetisie. Die standaard was regtig baie hoog en die wenner vir die Laerskool was Shirley Joubert; die Junior Sekondêre wenner, Carien Snyman en die Senior Sekondêre wenner, Donny Kotze. Baie geluk aan hierdie drie leerlinge. Hulle gaan ook ons skool in Windhoek verteenwoordig by die Nasionale ATKV-kompetisie.

15. Ons het reeds verlede week die borgvorms uitgedeel vir ons Sanlam Pretdag op 18 Maart. Die NBC sal weer, soos verlede jaar, 'n lewendige uitsending vanaf Stampriet doen, en ons versoek u om asb hierdie poging van ons baie mooi te ondersteun.

16. Op 'n Direksievergadering gehou op 9 Februarie 2009 is die volgende besluite geneem:

• a) Die skool, saam met die Boerevereniging, 'n kunstenaar kry om tydens die Stampriet Skou op te tree.
• b) Die skool stel weer die kampeerterrein, met ablusieblokke, asook parkeerplek aan die Boerevereniging beskikbaar.
• c) Klaskamers en die vierkant by die Louis van der Westhuizen Sentrum is vir stalletjies aan die Boerevereniging beskikbaar gestel.
• d) Die skool kan die kosvoorsiening vir die skou doen en die landbouleerlinge kan as "ring masters" opgelei word vir die skou.
• e) Ds Attie Boshoff lê 'n konsepprogram voor vir die Ouerkamp van 17 tot 19 April. Dit bestaan uit bespreking van vier onderwerpe, boeresport, kuier en lekker eet. Die Direksie keur dit goed en ‘n volledige program sal mettertyd aan ouers beskikbaar gestel word. Die kamp vind op die skoolterrein plaas met so min moontlik kostes vir ouers, en ouers word hartlik uitgenooi om dit by te woon.
• f) Direksielede moet ‘n opname maak oor alle probleme rondom skooldrag in hul groepe en daarna sal ‘n afvaardiging na Windhoek reis om alle probleme met die verskaffers uit te sorteer. Die Verskaffers sal dan ook versoek word om ‘n volledig goedgekeurde pryslys aan ouers beskikbaar te stel.
• g) Aangesien Mnr Jan Vermeulen nie meer kans sien om die skool se skaap te huisves nie, het die Direksie die skaap op dieselfde voorwaardes aan Mnr FJ van Zyl gegee.
• h) Die status quo sal gehandhaaf word ten opsigte van busgeld van die Mariental bus.
• i) Godsdiens en Geskiedenis moet deel gemaak word van die leerplan van Lewensoriëntering.
• j) Daar moet aansoek gedoen word vir telefoonhokkies vir Huis Marie.
• k) 'n Spesifikasie van Carducci-rekeninge is deur die Direksie aangevra. N$180.00 op alle rekeninge is vir fotostaatpapier vir die jaar en die res is vir die duplisering van CD’s wat as handboeke gebruik word. Goedgekeur deur die Direksie.
• l) Die Direksie keur goed dat die skool kan sluit vir die week na die Sportnaweek in Swakopmund, maar dat die twee vakansiedae van die volgende week weer ingewerk sal word.

• m) Direksielede sal in die toekoms meer betrokke gemaak word met take op die terrein.
• n) Alle ouers wie se skoolgelde vir 2008 nie op datum is nie, moet 'n brief ontvang om op 2 Maart 2009 voor die Direksie te verskyn om of die agterstallige bedrag te vereffen of om hul kinders uit die skool te neem.

• o) Die Quantum bussie sal nie aan enige ouergroep beskikbaar gestel kan word om kinders gedurende uitnaweke huistoe te vervoer nie.
• p) Prefekte mag voorlopig nie lugversorgers in hul koshuiskamers laat insit nie aangesien dit 'n presedent kan skep.
• q) Die Senior Leerlingraad kan 'n nuwe gestreepte band om hulle skoolbaadjies laat aanbring.
• r) Ouers moet asb onder geen omstandighede pamflette of geskrewe stukke van enige aard op die skoolterrein versprei sonder toestemming van die Direksie of skoolhoof nie. Dit kan die skool in 'n moeilike posisie plaas, aangesien daar ouers van beide kante van die saak kinders in die skool het. Die skool wil onder geen omstandighede deel wees van enige tipe veldtogte van ouers nie.

17. Alle pa's word uitgenooi om Vrydae middae vanaf 11:40 deel te wees van 'n kort biduurtjie saam met my in die kantoor. U hoef dus nie daar te staan en wag nie. Kom ons raak stil vir ‘n paar oomblikke en dan bid ons manne, wat die leiers van ons huise en ons skool is, vir 'n paar oomblikke saam.

Baie dankie aan Mariental Hotel vir die borg van hierdie jaar se omsendbriewe. Gebruik asb die spesiale aanbod vir verblyf vir Elnatan ouers. Advertensie hieronder aangeheg.

Wat ‘n wonderlike voorreg, vooruitsig, hoop. Ons ontvang dit gratis, sonder verdienste. Het u al die besluit geneem?

Groetnis,

Dawie O'Callaghan
Skoolhoof

---