Ek is sielsgelukkig

deur Rudolph du Plessis
(Aranos, Namibië)

In die hartjie van die Suide, vind ek God se grootste seën aan my as skolier. Die mooie Namibië is geseënd met een van die wonderlikste plattelandse skole. My groot droom is om hier te matrikuleer. Ek leer in die skool om volwasse op te tree en my man te staan op alle terreine. Die onderwysers is van die beste en uit goeie hout gekap; wie saam met my die pad sal stap totdat ek matriek voltooi het. Ek is uit my nate as ek Maandae by die skoolhek instap en weet dis waar ek wil wees. Dié skool lei my in die rigting waarheen ek wil gaan en maak dat ek uitsien na 'n blink toekoms.

Die o/15-rugbyspan van 2015 gee my hoendervleis as ek daaraan dink. My droom om in 'n finaal te speel het reeds in 2014 plaasgevind toe ek saam met my span die oorwinning gesmaak het met ons sege in Windhoek. Ek is vuur en vlam om hierdie jaar weer rugby te speel en dit gaan 'n hoogtepunt wees om weereens in ʼn rugbyfinaal mee te ding.

My opgewondenheid en joligheid ken geen perke as ek dink aan die sportnaweek vir privaatskole wat voorlê nie. Verseker gaan ons skool die ander mededingers wys dat hierdie instelling nie meer nat agter die ore is nie. Ek beplan reeds hoe ek gaan speel, nogtans besef ek dat die lewe soms onregverdig kan wees, maar in God se oë sal alles verloop soos Hy dit beplan het. Ek kan nie wag om te sien hoe netjies geklee, in blou-en-oranje, die leerlinge op die paviljoen gaan vertoon nie. Ek belowe dat elkeen deur 'n ring getrek sal kan word.

Goeie huisvriende sal ons vergesel na Walvisbaai. Saans sal ons bring en braai, want oom Giel is ʼn braaimeester – hy is soos Jan Braai – uitmuntend. My familie gaan definitief die sportnaweek bywoon en dié byeenkoms ondersteun.

Akademie is hoog op my prioriteitslys daarom werk ek met ywer om my plek in die Top 5 te behou. Net my beste is goed genoeg, dus sit ek altyd my beste voet voor.

Luid sing ek ons bekende skoollied:
"Ankervas in die Hemelvader,
werk ons onder suiderkruis,
leer ons vreugde van kennissoeke –
is gesond, gelukkig, tuis".

Stil en aangedaan besef ek dan:
Elnatan my trots, my rots, my waarborg!

Rudolph du Plessis, Gr.9

(Met hierdie opstel het Rudolf die derde plek in die Griffel Skryfkompetisie, Afdeling Kortkuns Gr.8 en 9, gewen.)